OIC YALALAMIKIA UJENZI WA ISRAEL MAKAZI YA WAPALESTINA

Jumuiya ya Ushirikiano ya Nchi za Kiislamu OIC  imelaani na kulalamikia uamuzi wa karibuni hivi wa utawala wa Kizayuni wa kutaka kujenga nyumba mpya 3000 huko katika Ukingo wa Magharibi wa Mto Jordan na Quds inayokaliwa kwa mabavu. Ikmaluddin Ehsanoghlo Katibu Mkuu wa jumuiya ya OIC amelaani vikali hatua hiyo ya Israel ya kutaka kujenga nyumba mpya nyingine za walowezi wa Kizayuni na kuitaja kuwa ni changamoto inayoikabili jamii ya kimataifa. Ikijibu kupandishwa hadhi Palestina na kuwa nchi mtazamaji isiyo mwanachama wa Umoja wa Mataifa serikali ya utawala wa Kizayuni imetangaza kuwa itajenga nyumba mpya elfu tatu huko mashariki mwa Quds inayokaliwa kwa mabavu na katika Ukingo wa Magharibi wa Mto Jordan. Gazeti la Kizayuni la Jerusalem Post pia limemnukuu Ehud Olmert waziri mkuu wa zamani wa Israel na kuandika kuwa kupasishwa ujenzi wa nyumba za walowezi elfu tatu huko Baitul Muqaddas na katika Ukingo wa Magharibi wa Mto Jordan ni dharau kubwa kwa Obama. Hii ni kwa sababu mara hii lobi ya Marekani imeshindwa kuzuia kutambuliwa nchi ya Palestina katika Umoja wa Mataifa. 

Baada ya nchi nyingi wanachama wa Baraza Kuu la Umoja wa Mataifa kupiga kura ya kuunga mkono kupandishwa hadhi ya Palestina na kuwa nchi mtazamaji isiyo mwanachama katika Umoja wa Mataifa, hivi sasa Wapalestina wanaweza rasmi kuwasilisha mashtaka na malalamiko yao kwa taasisi za Umoja wa Mataifa dhidi ya Israel. Viongozi wa Palestina wanasema kuwa kuendelea ujenzi na upanuzi wa vitongoji vya Israel katika ardhi za Palestina ni sababu tosha inayokubalika ili kuweza kuwasilisha faili hilo kwa Baraza la Usalama na Baraza Kuu la Umoja wa Mataifa na baada ya hapo taasisi za kimataifa zitekeleze wadhifa na nafasi yake mkabala na mashambulizi na ukiukaji wa haki za raia wa Palestina unaofanywa na Israel katika ardhi zinazokaliwa kwa mabavu za Palestina.

Hadi kufikia sasa makumi ya maazimio na hati zimepasishwa katika Umoja wa Mataifa zikilaani siasa za mabavu na za kupenda vita za utawala wa Kizayuni katika ardhi za Palestina zilizoghusubiwa. Mradi wa kujenga vitongoji vya walowezi ulianza tangu mwaka 1967 baada ya kuvamiwa na kukaliwa kwa mabavu Ukingo wa Magharibi wa Mto Jordan, Quds ya Mashariki na Ukanda wa Ghaza na ujenzi huo umekuwa ukiendelea hadi sasa. Vitongoji vya walowezi wa Kizayuni awali vilijengwa kandokando ya ardhi za Palestina na taratibu ujenzi huo umekuwa ukizidi kupanuliwa na sasa umefikia ndani kabisa ya ardhi za Palestina. Utawala wa Kizayuni unajenga na kupanua zaidi vitongoji hivyo kwa malengo mbalimbali ambapo moja kati ya hayo ni kutaka kuitenganisha miji na maeneo ya Wapalestina na vile vile kuizingira miji hiyo. 

Nyumba za walowezi wa Kizayuni zinajengwa katika ardhi za Wapalestina ili kukwamisha kuasisiwa nchi huru ya Palestina. Israel imejenga vitongoji vingi vya walowezi wa Kizayuni huko Quds na katika Ukingo wa Magharibi wa Mto Jordan katika miongo minne ya hivi karibuni lengo likiwa ni kubadili muundo wa kijamii na kijiografia wa maeneo hayo. Katika mazingira hayo Jumuiya ya Ushirikiano wa Nchi za Kiislamu sambamba na taasisi nyingine za kimataifa zinalaani siasa hizo za Israel zilizo dhidi ya binadamu.