WATALIBAN WAISHAMBULIA NATO HUKO AFGHANISTAN

Takriban watu 12 wakiwemo wanamgambo tisa leo wameuwawa na wengine 14 kujeruhiwa wakati kundi la Taliban lilipoishambulia kambi ya kijeshi mashariki ya Afghanistan. Msemaji wa polisi Hazrat Hossein amesema wanamgambo tisa waliokuwa na miripuko na silaha ndogo ndogo, pamoja na magurunedi wameishambulia kambi ya jeshi la Marekani karibu na uwanja wa ndege wa Jalalabad mashariki ya mkoa wa Nangarhar. Walinzi watatu wa kambi ya Marekani pia wameuawa na wengine 14 wamejeruhiwa. Wanamgambo hao pia wamedai kwamba wanajeshi kadhaa wa Afghanistan na wa kigeni wameuawa na kambi zao kuharibiwa. Msemaji wa Taliban Zabihulah Mujahid amesema wapiganaji wao walikuwa wamevalia sare za jeshi la Marekani na walipigana kwa saa mbili na nusu na majeshi ya Afghanistan na wa kigeni. Jumuiya ya Kujihami ya  NATO imesema hakuna aliyefanikiwa kuingia ndani ya kambi hiyo. Msemaji wa jeshi Meja Martyn Crighton amekanusha madai kuwa wanajeshi wa kigeni wameuwawa lakini amekiri kwamba kuna wanajeshi kadhaa waliojeruhiwa.