WAPALESTINA WAIKUMBUKA SIKU YA JANGA

Waandamanaji wa Kipalestina walipambana na wanajeshi wa Israel leo katika  Ukingo wa magharibi,wakati wa mandamano ya miaka 65 tangu kuundwa taifa la Israel. Siku hii hujulikana  kwa wapalestina kama Nakba ikiwa na maana ya janga. Hatua ya Israel ilisababisha wapalestina wengi kupoteza makaazi yao na wengine kuwa wakimbizi. Wakati huo huo msemaji wa  jeshi la  Israel amesema kombora lililofyatuliawa kutoka Ukanda wa Gaza liliangukia katika eneo moja la wazi ndani ya Israel lakini hakuna hasara iliyotokea.

Kwa upande mwengine Pande hasimu za Walestina Fatah na Hamas leo zimeweka kipindi cha miezi mitatu kuunda serikali ya pamoja na kuandaa chaguzi.Hayo ni kulingana na maafisa kutoka pande zote mbili.Makubaliano hayo yaliafikiwa hapo jana kati ya afisa anayesimamia masuala ya upatanishi ya Fatah Azzam al Ahmed na mwenzake wa Hamas Mussa Abu Marzuq yaliyofanywa  mjini Cairo,Misri.