KESI YA BRADLEY MANNING YAKAMILIKA

Nchini Marekani waendesha mashtaka  katika  mahakama ya kijeshi  wamekamilisha  kesi yao dhidi  ya  mwanajeshi anayeshtakiwa kwa  kuvujisha  nyaraka  za  siri kwa tovuti ya  Wikileaks. Katika uvujishaji mkubwa  kabisa  wa nyaraka za siri katika historia ya Marekani, kuruta wa ngazi ya kwanza Bradley Manning, anakabiliwa na madai  21, ikiwa ni pamoja na ujasusi,  udanganyifu  katika kompyuta na  kusaidia  adui. Manning anaweza  kukabiliwa  na kifungo  cha maisha bila  msamaha  iwapo  atapatikana na hatia.  Afisa  wa kupambana na ujasusi katika  jeshi ametoa ushahidi  wake  jana  katika  kikao  cha  faragha katika  mahakama  hiyo  ya  jeshi  kuhusu thamani  ya taarifa  zilizotolewa kwa adui ambazo Manning  alizivujisha. Waendesha mashtaka  wa  jeshi  wanamtambulisha Manning kuwa  ni  mtu aliyefanya kitendo hicho bila msaada wa mtu mwingine, na ambaye  alikuwa akijigamba kuhusu uwezo  wake wa udukuzi katika kompyuta. Wanadai  kuwa  kiburi  kilimfanya  Manning, mwenye umri wa miaka 25, kuchukua  hatua hiyo ya kuvujisha taarifa za siri.  Wakili  wa Manning amesema kuwa  mwanajeshi  huyo anayeaminika  kuvujisha taarifa  hizo hatayadhuru maslahi ya Marekani  kwa  kuwa hayazitatumika kwa lolote.