GARI LENYE SILAHA ZA UTURUKI LAKAMATWA YEMEN

Wizara ya Ulinzi ya Yemen imetangaza kuwa, maafisa usalama wa nchi hiyo wamefanikiwa kukamata lori lililosheheni silaha ambazo inasaidikiwa kuwa zimetengenezwa nchini Uturuki. Gari hilo lilikamatwa karibu na bandari ya Al-Hodayda iliyoko katika pwani ya magharibi mwa Bahari Nyekundu nchini Yemen. Maafisa hao wa usalama wa Yemen wamesisitiza kuwa, silaha hizo za Uturuki zilikuwa katika maboksi na makatuni ya plastiki pamoja na bidhaa za aina nyingine zilizokuwemo ndani ya gari hilo na kwamba gari hilo lilisimamishwa na maafisa hao katika eneo la pwani yapata kilomita 30 kutoka katika bandari hiyo ya Al- Hodayda nchini Yemen. Itakumbukwa kuwa, mwezi uliopita kulienea habari ya kukamatwa gari lililokuwa limebeba silaha za Uturuki katika bandari ya Aden kusini mwa Yemen. Tayari maafisa hao wa usalama wametangaza kuanzisha uchunguzi kuhusiana na tukio hilo.