MAREKANI KUIUZIA SILAHA SOMALIA

Rais Barack Obama wa Marekani ametangaza kuwa, Washington ina mpango wa kuiuzia silaha nchi ya Somalia iliyoko katika Pembe ya Afrika. Marekani imetangaza utayarifu wake wa kuiuzia silaha Somalia ikiwa ni mwezi mmoja tu baada ya Baraza la Usalama la Umoja wa Mataifa kupasisha azimio la kusimamisha kwa muda wa mwaka mmoja vikwazo vya silaha dhidi ya Somalia. Lengo la kupasishwa azimio hilo ni kuandaa uwanja kwa ajili ya kuisaidia serikali ya Somalia ili iweze kukabiliana na makundi ya wanamgambo likiwemo kundi la ash Shabab. Pamoja na hayo yote, uamuzi wa Marekani wa kuwa tayari kuiuzia silaha Somalia haupaswi kutazamwa kwa jicho zuri; kwani ni muendelezo ule ule wa siasa za kujitanua na za kupenda vita za viongozi wa Washington ambazo zimekuwa zikipewa kipaumbele katika siasa za nje na viongozi wa Ikulu ya White House katika maeneo mbalimbali ulimwenguni. Swali wanalopaswa kujiuliza walimwengu ni kuwa, kama kweli viongozi wa Marekani wanapigania masuala ya kibinaadamu na amani nchini Somalia, walikuweko wapi katika kipindi cha muongo mmoja uliopita wakati wananchi Waislamu wa nchi hiyo walipokuwa wakitaabika kwa ukame na njaa? Kwa nini waliipuuza Somalia wakati huo tena katika kipindi ambacho ilikuwa katika hali mbaya ya ukame na njaa? Ukweli wa mambo ni kuwa, baada ya operesheni ya kijeshi ya Marekani kushindwa vibaya mwaka 1993 huko Somalia, na wanajeshi wake kuuawa mjini Mogadishu, viongozi wa Washington waliipuuza na kuipa mgongo nchi hiyo masikini. Weledi wa mambo wanaamini kuwa, mpango wa hivi sasa wa Marekani wa kuiuzia silaha nchi iliyoharibiwa na machafuko ya Somalia hautakuwa na msaada wowote kwa serikali na wananchi wa nchi hiyo. Hatua ya Marekani ya kutuma na kuuza silaha Somalia, itaandaa uwanja wa kudumishwa vita, ukame, umasikini na kuvurugika zaidi hali ya mambo katika nchi hiyo. Baadhi ya wachambuzi wa mambo wanasema kuwa, hatua hiyo ya Marekani inafanyika katika mfemu ya kushindana kisiasa na kijeshi na Ufaransa. Marekani kama zilivyo Ufaransa na Uingereza, baada ya kumalizika kipindi cha ukoloni barani Afrika, inatapatapa huku na huko ili kuhakikisha kwamba, inapata upenyo wa kuwa na satua tena katika bara hilo lenye utajiri mkubwa wa maliasili. Wataalamu wa mambo wanaamini kwamba, mwezi Januari mwaka huu, wakati Marekani ilipoitambua rasmi na kwa mara ya kwanza serikali ya Somalia, walimwengu walipaswa kukihesabu kipindi hicho kuwa mwanzo wa kuanza tena siasa za utwishaji mambo za Washington dhidi ya wananchi na serikali ya nchi hiyo ya Pembe ya Afrika.