HALI YA KOREA BADO TATA

Serikali ya Korea Kusini imetahadharisha kuwa, uwezekano wa kuzuka vita vya nyuklia katika Peninsula ya Korea bado upo na hali ya mambo katika eneo hilo imeendelea kuwa mbaya. Hii ni baada ya Korea Kaskazini kuwataka raia wa kigeni kuondoka katika nchi jirani ya Korea Kusini ili wasije wakajipata katika mazingira ya kutatanisha pindi vita vitakapoanza. Televisheni ya Taifa ya Korea Kaskazini imesema makampuni ya kigeni mjini Seoul yanafaa kufungwa na kuwataka watalii katika mji huo na kwingineko kuondoke mara moja. Huku hayo yakijiri, mpaka wa China na Korea Kaskazini umefungwa kufuatia wasiwasi wa kutokea vita katika Peninsula ya Korea. Hata hivyo kamanda wa ngazi za juu wa Marekani amesema jeshi la nchi yake lina uwezo wa kuzuia makombora yote ya Korea Kaskazini hata yale ya nyuklia. Pyongyang inazituhumu Marekani na Korea Kusini kuwa zinakiuka haki yake ya kujitawala na imetishia kuzishambulia nchi hizo kwa makombora ya nyuklia.