MICHORO YA MHUSIKA WA MIRIPUKO YA BOSTON YAPATIKANA

Maafisa wa upelelezi wa Marekani wanaendelea kufanya uchunguzi kuhusu miripuko ya mabomu kwenye mbio za marathon za Boston iliyofanywa Jumatatu wiki hii. Ikiwa ni siku ya tatu ya uchunguzi huo leo, maafisa hao wamepata picha ya mshukiwa au washukiwa, ambao walibeba mzigo mzito uliofungashwa katika mfuko mweusi wa nailoni.

Ingawa bado haijulikani bayana kama mashambulizi yale yalifanywa na kikundi au mtu mmoja, au kama mshambulizi ni raia wa Marekani au mtu kutoka nje, maafisa hao wamesema wamepata ushahidi wa kutosha kutoa mwelekeo kwa uchunguzi wao. Miripuko miwili iliyopishana dakika chache karibu na msitari wa mwisho wa mbio hizo iliuwa watu 3 na kujeruhi wengine zaidi ya 170.

Watu 17 waliopata majeraha wako katika hali mahututi. Wachunguzi wamesema kuwa miripuko ilifungwa katika sufuria za kutumia mvuke. Waliouawa katika mashambulizi hayo ni mtoto wa kiume mwenye umri wa miaka 8, mwanamke mwenye umri wa miaka 29, na raia mmoja wa China.