WANANCHI WAPINGA SERIKALI YA MAPINDUZI AFRIKA YA KATI

Mamia ya maelfu ya wananchi wa Jamhuri ya Afrika ya Kati wamefanya maandamano katika mji mkuu wa nchi hiyo Bangui wakiulalamikia muungano wa waasi wa Seleka uliofanya mapinduzi nchini humo. Waandamanaji hao wamelalamikia mauaji ya kiholela yanayofanywa na waasi hao wa zamani pamoja na uporaji wa mali unaofanyika kwenye mji mkuu nchi hiyo. Arsene Ndirifei Mratibu wa taasisi na asasi zilizoitisha maandamano hayo amesema kuwa, walikuwa wanataka kupeleka miili ya wahanga kwenye hoteli anayoishi Michel Djotodia kiongozi wa wafanya mapinduzi ili ajionee jinai zinazotendwa na wanamgambo wa muungano wa Seleka. Mara baada ya kuangushwa serikali ya Rais Francois Bozize wa Jamhuri ya Afrika ya Kati, wanachama wa Jumuiya ya Kiuchumi ya Nchi za Afrika ya Kati ECCAS waliketi kwenye kikao cha dharura nchini Chad kuanzia tarehe Mosi hadi Pili mwezi huu, na kuwataka waasi wa Seleka kuunda serikali ya mpito nchini humo.