MELI YA MIZIGO YAGONGA MNARA WA KUONGOZEA MELI

Habari kutoka Italia zinasema kuwa meli moja ya mizigo imegonga mnara wa mawasiliano katika bandari ya Genoa na kusababisha vifo vya watu 3. Habari zaidi zinasema kuwa makumi ya watu bado hawajulikani waliko na huenda idadi ya vifo ikaongezeka. Meli hiyo iitwayo Jolly Nero imegonga mnara huo usiku wa kuamkia leo na duru za habari zinatupasha kuwa takriban watu 15 walikuwa kwenye mnara huo wa kuongozea safari za meli wakati wa ajali hiyo. Timu za waokoaji zimefika katika eneo la tukio na shughuli za kuwatafuta waliotoweka bado zinaendelea. Ajali hiyo imetokea huku wananchi wakiwa bado wana kumbukumbu chungu ya ajali nyingine ya meli iliyotokea mwaka uliopita ambapo zaidi ya watu 30 walipoteza maisha.