MANDELA ALAZWA HOSPITALI

Rais wa zamani wa Afrika Kusini Nelson Mandela jana alilazwa katika hospitali mjini Pretoria kwa ajili ya kufanyiwa vipimo vya afya, ingawa serikali ilisema hakukuwa na sababu ya kutaharuki. Taarifa kutoka ofisi ya rais Jacob Zuma haikuelezea kinagaubaga juu ya hali ya kiongozi huyo mwenye umri wa miaka 94. 

Mandela alilazwa hospitalini mwezi Februari kutokana na maumivu ya tumbo, lakini aliruhusiwa siku iliyofuata baada ya vipimo kuonyesha hakukuwa na jambo baya lililotokea. Mandela amekuwa kwa  muda  mrefu  akiishi katika  kijiji chake alikozaliwa cha Qunu, mashariki mwa mkoa wa Cape. Kutokana na afya yake iliyodhoofika, inamzuwia  kuonekana mara  kwa  mara  hadharani nchini Afrika Kusini.