PAKISTAN YATAKA WAMAGHARIBI WAONDOE VIKWAZO VYA IRAN

Kaimu Waziri wa Habari nchini Pakistan, amesisitizia udharura wa kufutwa vikwazo vya Wamagharibi dhidi ya Jamhuri ya Kiislamu ya Iran. Rashid Ahmad Chaudhri aliyasema hayo katika mahojiano na waandishi wa habari mjini Islamabad, Pakistan, na kusisitiza kuwa, nchi yake inawataka Wamagharibi kufutilia mbali vikwazo walivyoiwekea Tehran kwa kisingizio cha sialaha za nyuklia na kwamba Islam Abad inapinga mbinyo wa baadhi ya nchi za kibeberu dhidi ya nchi nyengine kwa kisingizio cha matumizi ya silaha za nyuklia.

 

Kiongozi huyo wa Pakistan pia amezungumzia makubaliano ya Tehran na Islamabad kwa ajili ya kuanza utekelezwaji wa ujenzi wa bomba la amani la usafirishaji gesi kutoka hapa nchini hadi Pakistan na kuongeza kuwa, Jamhuri ya Kiislamu ya Iran ni nchi ya kwanza kusafirisha gesi kwenda Pakistan na kwamba nchi yake ina hamu ya kuona uhusiano wa nchi mbili unaimarishwa zaidi hasa katika sekta za nishati.