NGUVU YA WAPALESTINA YAONGEZEKA

Waziri Mkuu wa serikali halali iliyochaguliwa na wananchi huko Palestina amesema kuwa, hatua ya wanajeshi wa utawala wa Kizayuni wa Israel ya kuwaua viongozi wanamuqawama wa Palestina imeifanya harakati ya muqawama ya wananchi wa Palestina kupata nguvu zaidi. Ismail Hania amesema hayo kwa mnasaba wa kumbukumbu ya mwaka wa tisa tangu kuuawa shahidi Sheikh Ahmad Yassin aliyekuwa kiongozi wa kiroho wa Hamas na kusisitiza kwamba, kuuawa viongozi mfano wa Sheikh Ahmad Yassin, Abdul Azizi Rantissi na wengineo kumeufanya muqawama wa wananchi wa Palestina uzidi kupata nguvu siku baada ya siku.  Amesema, Wazayuni walijihadaa kwa kudhani kwamba, kwa kuwaua viongozi wanamuqawama kama Sheikh Ahmad Yassin wangeweza kung'oa mizizi ya muqawama na kuharibu misingi yake; kwani hii leo muqawama wa Palestina una nguvu zaidi kuliko huko nyuma na umekuwa ukipata wafuasi zaidi kila leo. Wakati huo huo, Harakati ya Mapambano ya Kiislamu ya Palestina HAMAS imesisitiza kwamba, itaendelea na juhudi zake za kutaka kuachiliwa mateka wa Kipalestina wanaoshikiliwa katika magereza ya kuogofya ya utawala wa Kizayuni wa Israel.