UPINZANI SYRIA WATAKA KUWEKWA ENEO LA KUPELEKEA MISAADA ENEO LA QUSAYR

Upinzani  nchini  Syria  leo umeitaka  jumuiya  ya  kimataifa  kuweka eneo  la kupitisha misaada ya  kiutu kusaidia watu walioko  katika mji wa Qusayr, ambako mapigano makali kati  ya majeshi ya serikali  na waasi yanaendelea. Kaimu  mkuu  wa  baraza  la  muungano  wa kitaifa George Sabra amesema  kuwa anaitaka jumuiya ya kimataifa kuweka  eneo  ambalo  litatumika  kuwasaidia  watu  waliojeruhiwa na  kuingiza  madawa  na  misaada  mingine  kwa  watu  zaidi  ya 50,000  ambao  wamezingirwa. Amewataka  pia  waasi  nchini  humo kwenda  haraka  huko  ili kuudhibiti tena mji  wa  Qusayr , mji  ambao unaendelea  kushambuliwa  na majeshi  ya  serikali  yakisaidiwa  na wapiganaji  wa  kundi  la  Hezboullah  kutoka  Lebanon.

Naibu katibu  mkuu  wa Umoja  wa  mataifa  ya  Kiarabu Ahmad Ben Helli  amesema mataifa  hayo yameshutumu  kile  kichotokea Qusayr. Wakati  huo  huo naibu  waziri  wa  mambo  ya  kigeni  wa  Syria Faisal Muqdad  anatarajiwa  kuwasili  mjini  Moscow  leo kwa mazungumzo  na  waziri  wa  mambo  ya  kigeni  wa  Urusi Sergei Lavrov  kuhusiana  na  mkutano  unaopangwa  kumaliza  mzozo nchini  Syria.