RAIS MPYA WA IRAN ATAKA KUJIHUSISHA NA NCHI NYINGINE

Rais  mpya  wa  Iran  ameapa  kuleta  mabadiliko yanayotakiwa  na  wapiga  kura  baada  ya  miaka  minane ya  utawala  wa  kihafidhina. Hassan Rouhani  pia amependekeza  kufuata  njia  ya  kuhusiana  na  mataifa mengine  ya  dunia. Rouhani  ameeleza  kuchaguliwa kwake  kuwa  ni  enzi  mpya  na  kusema  atafuata  njia  ya wastani  na  haki, na  kuielekeza  nchi  hiyo  mbali  na misimamo  mikali. Rouhani  ametoa  matamshi  hayo  katika mkutano  wake  wa  kwanza  na  waandishi  habari  tangu kutangazwa  kuwa  mshindi  wa  uchaguzi  na  pia ameeleza  haja  ya  kufanyakazi kuelekea  uhusiano  mzuri na  jumuiya  ya  kimataifa. Kiongozi  huyo  mwenye umri wa  miaka  64 anatarajiwa  kuchukua  madaraka  kutoka rais  Mahmoud   Ahmedinejad mapema  mwezi  wa August, na  amesema  amepata  mamlaka  maalum  kutoka kwa  wapiga  kura  kufanya  mageuzi. Uchaguzi  huo uliofanyika  siku  ya  Ijumaa  umeshuhudia  akishinda asilimia  50  ya  kura , ambapo  watu  waliojitokeza  kupiga kura  ni  asilimia  73.