HOTUBA YA RAIS WA IRAN NCHINI MISRI

Rais Mahmoud Ahmadinejad wa Jamhuri ya Kiislamu ya Iran amesema kuwa, Uislamu ni dini ya ulimwengu na kwa ajili ya wanadamu wote, kwani hakuna mpaka wowote kwenye utu na ubinadamu. Akizungumza kwenye kikao cha 12 cha wakuu wa Jumuiya ya Ushirikiano wa OIC mjini Cairo Misri, Rais Ahmadinejad ameongeza kuwa, leo hii ulimwengu na hasa eneo la Mashariki ya Kati linapita katika kipindi hatari mno cha kihistoria na kusisitiza kuwa, kuna haja ya kuwekwa mikakati ya kukabiliana na changamoto zilizopo. Akisisitizia suala la kuwepo umoja na mshikamano katika ulimwengu wa Kiislamu, Rais Ahmadinejad ameongeza kuwa, umoja ni jambo lenye udharura kwa serikali na wananchi. Rais wa Iran amebainisha kuwa, umasikini, ubaguzi, udhalilishaji katika uhusiano wa kimataifa, ukandamizaji, uporaji wa maliasili na utajiri wa mataifa huru ni miongoni mwa changamoto za pamoja zinazoukabili ulimwengu wa Kiislamu.

 

Rais Ahmadinejad amesema kuwa, sehemu kubwa ya matatizo ya mwanadamu yanatokana na ukandamizaji, uingiliaji kati na uadui wa wakoloni, na kusisitiza kwamba popote duniani inapokuwepo dhulma, ubaguzi na umasikini, bila shaka nchi za Magharibi huchangia kwa kiasi kikubwa hali hiyo, kwani madola hayo hayatosheki hata kidogo na satua zao na kwamba lengo lao kuu ni kudhibiti maliasili na utajiri wote ulioko ulimwenguni. Rais wa Jamhuri ya Kiislamu ya Iran amesema kuwa, inasikitisha kuona kwamba leo hii baadhi ya mataifa ya Kiislamu yanacheza katika uwanja wa maadui na kushabikia migogoro na hitilafu za ndani zilizoko baina ya wananchi na mataifa ya Kiislamu. Rais Ahmadinejad amesisitiza kuwa madola hayo ya Kiislamu yanayocheza kwenye uwanja wa maadui yanapaswa kuondoka katika uwanja huo; na kutumia mshikamano na uwezo waliopewa wananchi wao ambao ni dhihirisho la nguvu za Mwenyezi Mungu, ili kuzima fursa za mashambulizi ya maadui.