MAHAKAMA YA EU YAIONDOLEA VIKWAZO BENKI YA IRAN

Mahakama Kuu ya Umoja wa Ulaya imepitisha uamuzi wa kuondolewa vikwazo benki inayomilikiwa na serikali ya Iran ijulikanayo kama Bank Saderat.

Katika uamuzi wake, mahakama hiyo imelitaka Baraza la Ulaya kuiondoa Bank Saderat katika orodha ya benki zilizowekewa vikwazo baada ya kusikiliza kesi iliyowasilishwa na benki hiyo.

Katika uamuzi wake, mahakama hiyo imesema vikwazo dhidi ya Bank Saderat ni kinyume cha sheria. Wiki iliyopita pia Mahakama ya Uadilifu ya Ulaya ilibatilisha vikwazo vya Umoja wa Ulaya dhidi ya benki nyingine ya Iran ijulikanayo kama Bank Mellat. Mwezi Desemba mwaka 2012 vile vile mahakama hiyo ya Uadilifu ya Ulaya yenye makao yake Luxemburg iliuamuru Umoja wa Ulaya ubatilishe vikwazo vyake dhidi ya benki nyingine ya Iran ijulikanayo kam Sina Bank. Ikumbukwe kuwa mwanzoni mwa mwaka 2012, Marekani na Umoja za Ulaya ziliidhinisha vikwazo dhidi ya sekta za mafuta na za fedha za Iran kwa lengo la kuzuia nchi zingine kununua mafuta ya Iran na kushirikiana na Benki Kuu ya Iran. Marekani na waitifaki wake wameiwekea Iran vikwazo kwa madai kuwa mpango wake wa kuzalisha nishati ya nyuklia una malengo ya kijeshi. Iran imekanusha madai hayo na imeweza kuthibitisha kuwa miradi yake ya nyuklia inafanyika kwa malengo ya amani na kwa mujibu wa sheria za kimataifa.