WASIWASI WA UN KUHUSU WAFUNGWA WA KIPALESTINA

Maafisa wa Umoja wa Mataifa wameelezea wasiwasi wao kuhusiana na hali mbaya ya wafungwa wa Kipalestina wanaoshikiliwa katika jela za Israel, hasa juu ya hali ya kiafya ya Samer Issawi anayegoma kula.

Kwa mujibu wa ripoti iliyotolewa na Umoja wa Mataifa, James Rawley Mratibu wa Masuala ya Kibinadamu wa Umoja wa Mataifa katika ardhi za Palestina zinazokaliwa kwa mabavu alikutana na Issa Qaraqe, Waziri wa Mamalaka ya Ndani anayeshughulikia masuala ya wafungwa wa Palestina katika Ukingo wa Magharibi wa Mto Jordan. Katika mazungumzo yao Rawley alisema kwamba Umoja wa Mataifa una wasiwasi mkubwa juu ya Wapalestina wanaoshikiliwa katika jela za Israel.

Wakati huo huo Eduardo Del Buey Naibu msemajiwa wa Ban Ki Moon Katibu Mkuu wa Umoja wa Mataifa amesema kuwa, wafungwa wa Kipalestina wanaoshikiliwa katika jela za Israel bila kufunguliwa mashtaka wanapaswa kuhukumiwa au kuachiliwa huru. Wapalestina 4,610 wanashikiliwa katika jela za kuogofya za Israel kutokana na sababu za kisiasa.