WESTEWELLE ATAHADHARISHA JUU YA KUPEWA SILAHA WAASI

Waziri wa mambo ya nchi za nje wa Ujerumani Guido Westerwelle ameonya kwamba  kuwapatia silaha waasi nchini Syria kunaweza kusababisha kile alichokiita mashindano ya silaha katika eneo hilo na kusisitiza kwamba Umoja wa Ulaya utatuma tu  vifaa vya kujilinda.   

Katika mahojiano na gazeti la  kila siku Tagesspiegel, Westerwelle alisema hali ya mambo nchini Syria ni yakushtusha na kwamba Ujerumani itafanya kila linalowezekana kuchangia katika kupatikana suluhisho la kisiasa, licha ya matatizo yote yalipo.

Lakini  akatahadharisha juu ya kuwapa  silaha waasi wanaojaribu kumuangusha Rais Bashar al-Assad, baada ya  mkuu wa jeshi la waasi la ukombozi wa Syria kusema kwamba wataweza kuuangusha utawala wa Assad katika muda wa  mwezi mmoja tu, pindi wakipatiwa silaha zinazofaa.  Waziri Westerwelle amesisitiza kwamba Ujerumani na Umoja wa Ulaya zinapaswa kusaidia mapambamno ya waasi hao, lakini haimaanishi tu katika masuala ya kijeshi, bali pia ujenzi wa miundo mbinu na huduma za afya.