WILLIUM HAGUE: HEZBBULLAH NA IRAN ZAONGEZA MISAADA YA KIJESHI SYRIA

Waziri  wa  mambo  ya  kigeni  wa  Uingereza  William Hague amesema  leo  kuwa  Iran  na  kundi  la  wanamgambo  wa Hezboullah  wameongeza  msaada  wao  wa  kijeshi  kwa  utawala wa  rais Bashar al-Assad  wa  Syria. Hague  ameuambia  mkutano na  waandishi  habari  kuwa  utawala  wa  Syria  unapata  msaada mkubwa  katika  miezi  ya  hivi  karibuni  kutoka  nje  ya   nchi  hiyo. Shutuma  zake  zinaakisi  madai  kutoka  kwa  upinzani  nchini  Syria kuwa  wapiganaji   kutoka  Iran  na  Hezboullah  wanaunga  mkono majeshi  tiifu kwa  al-Assad.

Waziri  wa  mambo  ya  kigeni  wa  Marekani  John Kerry  amesema kuwa  jumuiya  ya  kimataifa  itaongeza  msaada  wake  kwa upinzani  iwapo  rais Bashar al-Assad  hatakubali kushiriki  katika mazungumzo  na  upinzani. John Kerry  ameyasema  hayo  katika mkutano  na  waandishi  habari  leo baada  ya  mkutano  wa mataifa 10 yanayounga  mkono  upinzani  nchini  Syria akisisitiza  kuwa mkutano  huo ni  juhudi  za  kumaliza  mauaji nchini  humo.

Wakati  huo  huo  balozi  wa  Syria  nchini Jordan  ameshutumu mkutano  wa  mataifa  ambayo  yanaunga  mkono  upinzani  nchini Syria , na  kuuita  mkutano  huo  kuwa  ni  sehemu  ya  kampeni  ya Marekani  na  Israel  kuiharibu  nchi  hiyo.