MAPAMBANO YA WANANCHI WA UTURUKI YAZIDI KUSHIKA KASI

Waandamanaji  wamepambana  na  polisi  nchini  Uturuki usiku wa kuamkia leo licha  ya serikali  kuomba  msamaha kutokana  na  polisi  kutumia  nguvu  kupita  kiasi  dhidi  ya waandamanaji  hao. Naibu  waziri  mkuu  wa  Uturuki Bulent Arinc  ameomba  radhi  kwa  waandamanaji  ikiwa ni  juhudi  za  kusitisha  wimbi  hilo  kubwa  la maandamano  dhidi  ya  waziri  mkuu  Recep  Tayyip Erdogan.

Naibu  waziri  mkuu  Bulent Arinc  anatarajiwa  kukutana leo  na  watayarishaji  wa  chanzo  cha  maandamano  dhidi ya  mipango  ya  kujenga  jengo litakalokuwa  na  maduka lililo  katika  mfano  wa  banda  la  enzi  za  utawala  wa himaya  ya  Ottoman   katika  bustani  maarufu  ya  mjini Istanbul  katika  uwanja  wa  Taksim. Lakini  amekataa kuzungumza  na  baadhi  ya  makundi  ambayo anayashutumu kwa kutumia  hali  hiyo  na  kuchochea ghasia.

Wakati  huo  huo  polisi wametumia  mabomba  ya  maji  na mabomu  ya  kutoa  machozi  kuwatawanya  waandamanaji waliokusanyika  kwa  usiku  wa tano mjini Istanbul na Ankara.