VIONGOZI WA AMERIKA YA KUSINI KUKUTANA

Marais wa mataifa ya Amerika ya kusini wanapanga mkutano  wa  dharura  leo  kujadili  kuhusu  kukatishwa kwa  safari  ya  ndege  iliyokuwa  imemchukua  rais  wa Bolivia  Evo  Morales  na  kwenda  Austria. Balozi  wa Bolivia  katika  umoja  wa  mataifa  amesema  kuwa  ndege ya  Bolivia, ambayo  ilikuwa  imemchukua  rais Morales wakati  akirejea  nyumbani  kutoka  mjini  Moscow, ililazimishwa  kutua  na  kukaguliwa   mjini  Vienna, Austria, kwa  shaka  ya  kwamba  mfanyakazi  wa  shirika  la ujasusi  la  Marekani,  Edward Snowden, huenda alikuwamo  katika  ndege  hiyo. Uchunguzi  uligundua kuwa  Snowden  hakuwamo  katika  ndege  hiyo  na iliruhusiwa  kuendelea  na  safari  mchana  wa  leo. Waziri wa  mambo  ya  kigeni  wa  Bolivia  David Choquehuanca amesema  kuwa  serikali  yake  inataka  kujua nini kilichotokea.

Balozi  wa  Bolivia  katika  umoja  wa  mataifa, Sacha Llorenti, amewaambia  waandishi  habari  mjini  Geneva leo  kuwa  amefahamishwa kutakuwa  na  mkutano  wa dharura  wa  viongozi  wa  umoja  wa  mataifa  ya America ya  kusini, UNASUR, lakini  hakuna  muda  maalum uliopangwa  kwa  ajili  ya  mkutano  huo. Rais Morales ameonesha  kukasirishwa  mno  na hatua  ya  mataifa kadha  ya  Ulaya  kutoiruhusu ndege  yake  kupita  katika anga  lao.