MAFURIKO YAANZA KUPUNGUA UJERUMANI

Mafuriko katika  eneo  la  kusini  mwa  Ujerumani  katika  mto Danube  yanaanza  kupungua, ikiwa  ni  taarifa  nzuri  kwa  maafisa wanaoendelea  kufanya  usafi  wa  mazingira  baada  ya  mvua kubwa  kunyesha  katika  eneo  la  Ulaya  ya  kati. Hata  hivyo  maji  ya  mto  Elbe , ambayo  yalivunja  tuta  la  kuzuwia maji  mapema  siku  ya  Jumatatu  mashariki  mwa  mji  wa Magdenburg, yanaelekea  katika  mji  wa  Hamburg. Hali  inaangaliwa katika  mji  wa  Lauenberg  katika  jimbo  la  kaskazini  la  Schleswig-Holstein, ambako  mto  Elbe  unatarajiwa  kujaa  kuanzia  kesho.

Katika  wiki  chache  zilizopita , mvua  imesababisha  mito  mikubwa kufurika ,  na   uharibifu  mkubwa   katikati  na  kusini  mwa Ujerumani, Jamhuri  ya  Czech , Austria, Slovakia  na  Hungary. Gharama  za  uharibifu zinakadiriwa  na  shirika  la  viwango  la  Fitch kufikia  kiasi  ya  euro  bilioni  12  nchini  Ujerumani  pekee, wakati mashirika  ya  bima  yatapata  hasara  ya  kiasi  cha  kati  ya   euro bilioni  mbili  na  bilioni  tatu  na  nusu. Waziri  wa  mazingira  wa  Ujerumani  Peter Altmeier  ametoa  wito wa  kuwa  na  mtazamo  mpya  juu  ya  ulinzi  dhidi  ya  mafuriko.