MPALESTINA MMOJA AULIWA HUKO GHAZA

Jeshi la utawala wa Kizayuni limekiuka makubaliano ya kusitisha vita huko Ghaza na kumuuwa shahidi kijana mmoja wa Kipalestina mkazi wa eneo hilo. Duru za hospitali za Palestina zimearifu kuwa Mahmoud Jarhun aliyekuwa na miaka 21 ameuliwa shahidi kwa kufyatuliwa risasi na wanajeshi wa utawala wa Kizayuni huko mashariki mwa mji wa Rafah. Hii ni katika hali ambayo Wapalestina wangine 11  walijeruhiwa jana kwa risasi na wanajeshi wa Israel  huko katika eneo kati ya mpaka wa Ukanda wa Ghaza na ardhi za Palestina zinazokaliwa kwa mabavu. Mashambulizi ya siku nane ya jeshi la Israel huko Ghaza yalianza siku ya Jumatano  ya tarehe 14 Novemba na kuendelea hadi Jumatano  Novemba 21 hata hivyo utawala huo ghasibu mwishowe ulilazimika kukubali kusimamisha vita ulivyovianzisha dhidi ya raia wa Ukanda wa Ghaza kutokana na muqawama mkubwa ulioonyeshwa na Wapalestina.

MAREKANI YAKARIPIA TAIFA HARAMU LA ISRAEL KUENDELEZA UJENZI MAENEO YA WALOWEZI.

Marekani imekosoa uamuzi wa Israel kujenga nyumba 3,000 za walowezi mashariki mwa Jerusalem na katika ukingo wa magharibi, ambapo waziri Hillary Clinton amesema hatua hiyo kuwa inarudidha nyuma jitihada za amani.

Mapema, Ikulu ya Marekani iliita hatua hiyo ambayo imekuja siku moja baada ya Umoja wa Mataifa kupiga kura ya kihistoria na kuipandisha Palestina hadhi ya nchi muangalizi siku ya Alhamisi kwa kuzingatia mipaka ya mwaka 1967, kama isiyo na manufaa yoyote. "Kwa kuzingatia tangazo la leo (30.11.2012), naomba nirejee kwamba utawala huu, kama tawala zilizotangulia, umeweka bayana kwa Israel kuwa shughuli hizo zinarudisha nyuma jitihada za majadiliano ya amani," alisema Clinton.

Clinton aliyasema hayo wakati akizungumza katika jukwaa lilioandaliwa na kituo cha sera za mashriki ya kati cha Saba mjini Washington, mbele ya hadhira iliyowajumuisha mawaziri wa mambo ya kigeni wa Israel Avigdor Lieberman na wa Ulinzi Ehud Barak. Clinton alisema kuwa suluhisho la kudumu la mgogoro wa Gaza lingekuwa mpango mpana wa amani kati ya Israel na Wapalestina wote, wakiongozwa na wawakilishi wao halali, mamlaka ya Palestina.

 

 

Aelezea sababu za kuipinga Palestina Umoja wa Mataifa

Utawala wa rais Barack Obama ulijaribu kuzuia shinikizo la Palestina la kutambuliwa na Umoja wa Mataifa, ukisema kuwa hatua hiyo ingekuwa kizingiti katika njia ya amani na kwamba taifa la Palestina lingetokana tu na mazungumzo na Israel. "Wote tunapaswa kuweka kituo baada ya kura ya wiki hii. Pande zote zinapaswa kutafakari kwa kina njia iliyoko mbele yetu," Clinton alisema. Aliongeza kuwa pande zote zinapaswa kufanya kazi kwa pamoja ili kutafuta njia ya kusonga mbele katika mazungumzo ambayo ndiyo yataleta suluhisho la mataifa mawili, ambayo inabaki kuwa shabaha yao.

Alisema pande mbili zitakapokuwa tayari kushiriki tena mazungumzo, rais Obama atakuwa tayari kushirikiana nao kikamilifu. Mapema, msemaji wa bazara la taifa la usalama, Tommy Vietor alisema kuwa Marekani inarejea upinzani wake wa muda mrefu dhidi ya makaazi ya walowezi, ujenzi mashariki mwa Jerusalem na matangazo ya Israel. "Tunaamini vitendo hivi havileti manufaa yoyote zaidi ya kuhujumu jitihada za kurudi kwenye meza ya mazungumzo;" alisema Vietor.

 

 

PLO yalaani tangazo la Israel

Taarifa za vyombo vya habari zimesema baadhi ya ujenzi wa Israel utafanyika katika eneo linalogombaniwa katika ukingo wa magharibi maarufu kama E1, ambalo linapita kati ya upande wa mwisho wa mashariki ya eneo lililotekwa la Jerusalem mashariki, na makaazi ya Maaleh Adumim. Chama cha Ukombozi wa Palestina, PLO, kimelaani hatua hiyo na kusema ni uvamizi dhidi ya taifa hilo. Wapalestina wanapinga kwa nguvu zote, mradi wa E1 kwa sababu unaligawanya eneo la ukingo wa magharibi katika vipande viwili - kaskazini na kusini, hatua ambayo inafanya uundwaji wa taifa la Palestina kuwa mgumu.

Wapalestina wanaitaka Jerusalem kuwa mji mkuu wa taifa lao na wanapinga mipango ya upanuzi wa Maaleh Adumim, eneo lililoko kilomita 5 kutoka ukingo wa mashariki wa mji wa Jerusalem. Kitendo cha Marekani kulaani ujenzi wa makaazi ya walowezi na Israel huko nyuma kimekuwa kikisababisha malumbano kati ya Obama na waziri mkuu Benjamin Netanyahu. Viongozi hao wawili wana uhusiano wa mashaka hivi sasa, licha ya hoja za utawala wa rais Obama kuwa serikali hiyo imefanya kazi ya ziada kuhakikisha inalinda usalama wa Israel kuliko utawala uliyopita.

 

KATIKA MAWAIDHA YA IMANI PETRO JUU YA MBINU ZA MAKAFIRI.

IRAN YATISHIA KUJITOA NPT

Iran imetishia kujiondoa katika mkataba wa kimataifa unaopinga uendelezaji wa nyuklia, NPT, kama vinu vyake vya nishati hiyo vitashambuliwa. Mwakilishi wa Iran katika Shirika la Nguvu za Atomiki Duniani, IAEA, Ali Asghar Soltanieh ametoa msimamo wa nchi yake mjini Vienna, Austria akirejerea kitisho cha Israel kuvishambulia vinu vya nyuklia vya nchi hiyo ambacho sasa kimezidi kuongezeka. Ali amesema kuwa uwezekano wa bunge la Iran kuilazimisha serikali kuuzuia ukaguzi wa IAEA kwenye vinu vya nyuklia vya nchi hiyo na hata kujitoa kwenye NPT. Mkataba wa NPT unazuia nchi ambazo hazina silaha za nyuklia kuzitengeneza. Mataifa ya magharibi yana wasiwasi kuwa kujitoa kwa nchi hiyo kwenye NPT ni mwanzo wa kutengeneza silaha za nyuklia. Hata hivyo taarifa za IAEA zinasema kuwa huenda Iran imefanya utafiti kuhusu utengenezaji wa silaha lakini si kwamba  tayari wanazitengeneza. 

TAIFA HARAMU LA ISRAEL KUJENGA NYUMBA 3,000 ZA WALOWEZI

Siku moja baada ya Hadhara Kuu ya Umoja wa Mataifa kuikubalia Palestina kuwa mwanachama asiyekuwa dola kwenye Umoja huo, taifa haramu la Israel imetangaza mpango wake wa kujenga nyumba 3,000 za walowezi katika maeneo inayoyakalia ya Jerusalem Mashariki na kwenye Ukingo wa Magharibi. Licha ya uamuzi huo kuchukuliwa tangu zamani, lakini kutangazwa kwake leo kumetajwa kama ujumbe kwa Wapalestina, kwamba kupatiwa kwao uwanachama huo kwenye Umoja wa Mataifa, hakujabadilisha chochote kwenye sera za makaazi ya walowezi za Israel. Hapo jana, mabalozi wa Israel na Marekani kwenye Umoja wa Mataifa, waliwaambia wajumbe wa Hadhara Kuu ya Umoja huo, kwamba uamuzi wa kuipa uwanachama Palestina, ulikuwa bahati mbaya na kikwazo kwa juhudi za kutafuta amani ya Mashariki ya Kati.

MELI YA KIVITA YA IRAN YATIA NANGA SUDAN

Meli ya kivita ya Jeshi la Wanamaji la Jamhuri ya Kiislamu ya Iran imetia nanga katika bandari ya Sudan katika Bahari Nyekundu.
Kamanda wa Jeshi la Wanamaji la Iran Admeli Habibollah Sayyari amesema manowari hiyo ijulikanayo kama  'Jamaran' na ambayo imetengenezwa kikamilifu nchini Iran imewasili Sudan ikiwa na ujumbe wa amani na kirafiki kwa nchi za eneo na rafiki.
Manowari hiyo ni sehemu ya msafara wa 23 wa Jeshi la Wanamaji la Iran uliotumwa katika Bahari Nyekundu. Msafara wa 22 wa manowari za kivita za Iran ulirejea nchini mapema mwezi huu baada ya kumaliza kazi ya siku 75 katika maji ya kimataifa.
Jeshi la wanamaji la Iran limeimarisha harakati zake katika maji ya kimatiafa kwa lengo la kulinda doria na kusindikiza meli za Iran na za kigeni katika maji hayo. Katika fremu ya juhudi za kimataifa za kukabiliana na maharamia, Jeshi la Wanamaji la Iran limekuwa likilinda doria katika Bahari Hindi na Ghuba ya Aden tokea Novemba mwaka 2008.
Shirika la Umoja wa Mataifa linalohusika na masuala ya bahari IMO limepongeza juhudi na mafanikio ya Iran katika kupambana na maharamia.

PALESTINA YAWA NCHI MTAZAMAJI WA UN

Palestina imekubaliwa kuwa nchi mtazamaji asiyekuwa mwanachama katika Umoja wa Mataifa.
Katika kura iliyofanyika jana kwenye Baraza Kuu la Umoja wa Mataifa mjini New York, Palestina ilifanikiwa kupata kura 138 za ndio mkabala wa kura 9 zilizopinga Palestina kuwa nchi mtazamaji katika Umoja wa Mataifa.
Matokeo hayo yamepandisha juu nafasi na hadhi ya Palestina ambapo sasa inatambuliwa kuwa ni nchi mtazamaji katika Umoja wa Mataifa badala ya jumuiya mtazamaji katika jumuiya hiyo ya kimataifa.
Habari hiyo ya kutambuliwa Palestina kuwa ni nchi mtazamaji badala ya jumuiya katika Umoja wa Mataifa imezusha furaha, vifijo na nderemo huko Palestina. Hatua hiyo inaipa Palestina fursa ya kushiriki katika vikao vya Umoja wa Mataifa na kuboresha uanachama wake katika taasisi za umoja huo.
Mwaka 2011 Wapalestina waliomba kutambuliwa rasmi kama nchi mwanachama katika Umoja wa Mataifa lakini ombi hilo halikufanikiwa kutokana na upinzani wa Marekani na waitifaki wake.
Mara hii pia Marekani pekee kati ya nchi tano wanachama wa kudumu wa Baraza la Usalama la Umoja wa Mataifa imepinga suala la kupewa Palestina sifa ya nchi mtazamaji huku Uingereza ikikataa kupiga kura.

KATIKA KUMBUKUMBU YA LEO IJUMAA

Leo ni Ijumaa tarehe 16 Muharram 1434 Hijria, sawa na tarehe 30 Novemba 2012 Miladia.

Siku kama ya leo miaka 24 iliyopita aliaga dunia ustadh na karii mashuhuri wa Qur'ani Abdul Basit Muhammad Abdul Samad katika mji mkuu wa Misri, Cairo. Alianza kujifunza Qur'ani Tukufu akiwa bado mtoto mdogo na alipewa tuzo ya kuhifadhi na kusoma Qur'ani akiwa na umri wa miaka 12. Kipindi fulani Ustadh Abdul Basit alitumia muda wake mwingi kusafiri katika nchi za Kiislamu na kuwahamasisha watu kusoma kitabu cha Mwenyezi Mungu. Ustadh Abdul Basit ameacha kanda nyingi za Sauti ya kiraa yake ya Qur'ani Tukufu ambazo bado zinawavutia wasomaji wengi wa Qur'ani.

BARAZA LA WAASISI MISRI LAPASISHA RASIMU YA KATIBA

Baraza la Waasisi la Misri limepasisha vipengee vya rasimu ya katiba mpya ya nchi hiyo katika kikao kilichofanyika jana.
Moja ya vipengee muhimu vya rasimu ya katiba mpya ya Misri ni kile kinachosisitiza kuwa sheria za Kiislamu ndio marejeo ya sheria zote za nchi hiyo. 

Rasimu ya katiba mpya ya Misri pia inasisitiza kuwa kipindi cha urais wa nchi sasa kitabanwa katika duru mbili, tofauti na ilivyokuwa katika utawala wa dikteta wa zamani wa nchi hiyo ambaye aliiongoza Misri kwa zaidi ya miaka 30. Rasimu hiyo itawasilishwa kwa Rais Muhammad Mursi ambaye baada ya kuipasisha ataitisha kura ya maoni ya wananchi na kuwa katiba mpya ya nchi hiyo.
Katiba ya zamani ya Misri ilibatilika baada ya mapinduzi ya wananchi ya mwaka jana.

MUUNGANO WA TANZANIA UVUNJIKE USIVUNJIKE?

NJIA KUMI ZA KUHIFADHI QUR' AN. Part. 1

Imekusanywa na Ukht Haliymah ‘Abdullaah

 

“كيف تحفظ القرآن في عشر خطوات – حسن أحمد بن أحمد همام”

 

Haifichiki kwa kila Muislam ubora wa kuhifadhi Qur-aan Tukufu na fadhla za aliyeihifadhi.

 

Anasema Allaah (Subhaanahu wa Ta’ala):

 

“Wale tuliowapa kitabu (Taurati, injili, Zaburi…) wakakisoma kama ipasavyo kukisoma (bila ya kupotoa tafsiri yake wala kutoa hili na kutia lile), hao huiamini hii (Qur-aan wakasilimu). Na wanaokikanusha (hicho kitabu chao wakapinduapindua tafsiri yake na wakaongeza na wakapunguza), basi hao ndio wenye hasara.” Al-Baqarah: 121.

 

“Kisha Tumewarithisha, (tumewapa) kitabu (hiki cha Qur-aan) wale Tuliowachagua miongoni mwao wanaodhulumu nafsi zao (kwa kuwa na maasia mengi kuliko mema). Na wako wa kati na kati, (wana mema kuliko mema). Na wako wanaokwenda mbele kabisa katika mambo ya kheri, kwa idhini ya Mwenyezi Mungu. Hiyo ndiyo fadhila kubwa.” Faatwir: 32.

 

“Kwa yakini wale wanaosoma kitabu cha Mwenyezi Mungu, na wakasimamisha Swalah, na katika yale Tuliyowapa wakatoa, kwa siri na kwa dhahiri, hao wanatumai (faida ya) biashara isiyododa (isiyobaga).” Faatwir: 29.

 

Katika hizi Aayah ni dalili ya ubora ya watu wa Qur-aan na kufaulu biashara yao na Allaah.

Ama Hadiyth za Mtume (Swalla Allaahu ‘alayhi wasallam) ni nyingi tunachukua zifuatazo:

 

kutoka kwa ‘Abdullaah bin ‘Umar (Radhiya Allaahu ‘anhu) amesema, amesema Mtume (Swalla Allaahu ‘alayhi wasallam):

 

“Hakuna hasadi ila katika vitu viwili; mtu ambaye Allaah Amempa hekima (elimu) anaisimamia usiku na mchana, na mtu ambaye Allaah Amempa mali naye anatoa sadaka usiku na mchana.” Muslim

 

Kutoka kwa ‘Uthmaan bin ‘Afaan (Radhiya Allaahu ‘anhu) anasema, anasema Mtume (Swalla Allaahu ‘alayhi wasallam):

 

“Mbora wenu ni aliyejifunza Qur-aan na akaifundisha.” Al-Bukhaariy

 

Kutoka kwa ‘Abdullaah bin ‘Amru bin Al-‘Aas (Radhiya Allaahu ‘anhu) kutoka kwa Mtume (Swalla Allaahu ‘alayhi wasallam) amesema:

 

“Ataambiwa Swaahib al-Qur-aan soma kama ulivyokuwa ukisoma duniani hakika daraja yako peponi ni mwisho wa Aayah utakayosoma.” At-Tirmidhiy

 

Kutoka kwa Sahl bin Mu’adh kutoka kwa baba yake kwamba Mtume (Swalla Allaahu ‘alayhi wasallam) amesema:

 

“Mwenye kusoma Qur-aan na akaifanyia kazi yaliyomo atavalishwa mzazi wake taji siku ya kiyama mng’aro wake ni bora kuliko mwangaza wa jua katika nyumba za dunia lau ingekuwa kwenu mnadhani vipi kwa aliyeifanyia kazi.” Abu Daawuud

 

Imepokewa katika Al-Bukhaariy kwamba walikuwa wanatangulizwa watu wa Qur-aan (Ahlul Qur-aan) kuliko wengine katika Swallah na katika kuwazika mashahidi. Pia kuna mtu alimuoa mwanamke kwa Qur-aan aliyokuwa nayo kama mahari.

 

KUHIFADHI QUR-AAN NI KHASWA KWA UMMAH HUU

Allaah Amejaalia Ummah huu kuwa bora kuliko Ummah zingine na Akajaalia wepesi kuhifadhi  Kitabu hiki kimaandishi na kifuani.

 

Anasema Allaah (Subhaanahu wa Ta’ala):

 

“Bali hizi ni Aayah waziwazi (zinazokubaliwa) katika vifua vya wale waliopewa ilimu, na hawazikatai Aayah Zetu isipokuwa madhalimu (wa nafsi zao).” Al-‘Ankabuut: 49

 

Na imekuja katika Hadiyth al-Qudsiy;

 

“Na imeteremshwa kwako Kitabu kisichooshwa na maji unasoma ukiwa umelala na ukiwa macho.” Muslim

 

Itaendelea Ijumaa ijayo inshaa -Allah........................

UN KUPIGA KURA YA PALESTINA

Rais wa Palestina Mahmud Abbas anapanga leo kushinikiza kupitishwa kura ya Umoja wa Mataifa ya kuitambua Palestina kama taifa. Ujerumani haitaunga mkono jitihada za Palestina za kutaka hadhi ya dola mwangalizi ndani ya Umoja wa Mataifa. Baraza Kuu la Umoja wa Mataifa lenye nchi wanachama 193 linatarajiwa kupiga kura kwa wingi kuunga mkono ombi hilo, ambalo litaipa Mamlaka ya Palestina kibali cha kujiunga na mahakama za kimataifa kama vile Mahakama ya Kimataifa ya Uhalifu wa Kivita mjini The Hague, Uholanzi. Waziri wa mambo ya kigeni wa Marekani Hillary Clinton anasema msimamo wao haubadiliki. Kuna wasiwasi miongoni mwa wanaounga mkono Israel kwamba Wapalestina watajaribu kuishitaki nchi hiyo ya Kiyahudi kwa uhalifu wa kivita katika mahakama ya ICC. Ombi la Palestina limeugawanya Umoja wa Ulaya, huku Ujerumani na Uingereza zikisema zitasusia kura hiyo nayo Ufaransa ikisema itaunga mkono jitihada hizo za kutaka hadi ya uangalizi.

MASHAMBULIO YA KIGAIDI DHIDI YA WAISLAM MAREKANI

Polisi ya jimbo la Texas nchini Marekani inamshikilia raia mmoja wa nchi hiyo kwa tuhuma za kutaka kuwashambulia waumini wa Kiislamu waliokuwa wakisali Msikitini. Polisi ya Texas imeeleza kuwa, Christopher Bane mwenye umri wa miaka 44 anashikiliwa na jeshi la polisi katika jimbo hilo kwa kosa la kutaka kuwafyatulia risasi Waislamu waliokuwa ndani ya Msikiti mmoja katika mji wa San Antonio. Taarifa za polisi zinasema kuwa, Christopher Bane alikuwa na azma ya kuwashambulia Waislamu hao na kisha ajiuwe. Polisi ya Texas imeeleza kuwa, msamaria mwema mmoja alitoa taarifa hizo kituoni za kutaka kushambuliwa Waislamu. Kabla ya hapo, ofisi ya Baraza la Mahusiano ya Kiislamu nchini Marekani katika jimbo la Chicago lilitangaza kushambuliwa Msikiti mmoja ulioko katika mji wa Morton Grove. Baraza hilo limeongeza kuwa, katika kipindi cha mwezi mmoja uliopita, Misikiti miwili iliteketezwa moto katika jimbo la Missouri nchini Marekani.

WAFUNGWA 3,800 WALIOHUKUMIWA KIFO WAPELEKWA SYRIA

Mkuu wa Shirika la Habari la Iraqi al Nakhil amesema kuwa nchi za Kiarabu za Ghuba ya Uajemi zimewatuma nchini Syria wafungwa 3,800 waliohukumiwa adhabu ya kifo kwa shabaha ya kupigana dhidi ya serikali ya Rais Bashar Assad wa nchi hiyo.

Muhammad Ali al Hakim amesema kwamba, hadi sasa wafungwa 3,800 waliohukumiwa adhabu ya kifo katika baadhi ya jela za nchi za Kiarabu za Ghuba ya Uajemi ikiwemo Qatar, Saudi Arabia na Kuwait wameachiliwa huru na kupelekwa  nchini Syria ili kutekeleza operesheni za kigaidi.

Mkuu wa shirika la habari la Iraq al Nakhil amesema, Walid Twabatwabai mwakilishi wa Masalafi katika Bunge la Kuwait ndiye anayegharamia kupelekwa wafungwa hao wa Kiarabu nchini Syria kutekeleza operesheni za kigaidi. Walid Twabatwabai miezi mitatu iliyopita aliitembelea Syria na mbali na kushiriki katika maandamano dhidi ya serikali ya Rais Bashar al Assad wa nchi hiyo alitangaza kuwa yuko tayari kutoa fedha na kuunga mkono magaidi nchini humo.

Kwa miezi kadhaa sasa Syria inakabiliwa na machafuko ambapo makundi ya kigaidi yanayoungwa mkono na nchi za kigeni yanapigana dhidi ya serikali ya Damascus.

MWILI WA HAYATI YASSIR ARAFAT WAFUKULIWA KWA UCHUNGUZI

Mwili wa kiongozi wa zamani wa Palestina, Yasser Arafat, umefukuliwa kutoka kaburi lake liloko ukingo wa Magharibi mjini Rammala ili kuwawezesha kuufanyia uchunguzi kubaini iwapo aliuwawa kwa sumu. Bwana Arafat alifariki dunia mwaka 2004 nchini Ufaransa baada ya kuugua kwa kipindi kifupi.

 

Maradhi yaliyopelekea kifo chake hayakubainika. Uamuzi wa kuufukua mwili wa Yasser Arafat katika kaburi lake lililoko ukingo wa Magharibi unafuatia makala ya televisheni iliyodai kupata mabaki ya madini ya kitonoradi aina ya Polonium kwenye nguo zake.

 

Wapalestina wengi wanashuku kwamba huenda Israel ilihusika katika kifo cha kiongozi huyo. Israel imekuwa ikikanusha shutuma hizo.

Uchunguzi wa mauaji dhidi ya Bwana Arafat umeanzishwa nchini ufaransa kufuatia ombi lililowasilishwa na mjane wake.